ფოთში, აგრარული ბაზარი ხვალიდან განაახლებს ფუნქციონირებას, ხოლო სასაფლაოები, როგორც ფოთის მერიაში აცხადებენ, 27 აპრილიდან გაიხსნება. მათივე თქმით, ამ დროის განმავლობაში მოქალაქეების მხრიდან, რაიმე სახის დარღვევას ადგილი არ ჰქონია. შეგახსენებთ, რომ ბაზარი და სასაფლაო, კორონავირუსის გავრცელების პრევენციის მიზნით, წინასააღდგომოდ, 17 აპრილს დაიკეტა. ცნობისათვის, ფოთში, თვითიზოლაციის რეჟიმში 72 მძღოლი იმყოფება. დღეს კარანტინის სივრცეში 34 მძღოლი იქნა გადაყვანილი.

,,ფოთის ცხელების ცენტრში მოთვსებული 14 პაციენტიდან, 5  ერთი ოჯახის წევრია, ისინი ოზურგეთიდან არიან. ჩვენს კლინიკაში იმყოფება ცოლ- ქმარი აფხაზეთიდან, გვყავს პაციენტები როგორც ოზურგეთიდან, ისე ლანჩხუთიდან, კერძოდ გრიგოლეთიდან. ყველაზე უმცროსი, 8 თვის გოგონაა ფოთიდან. 3 პაციენტის ანალიზი უკვე გაგზავნილია ლუგარის ლაბორატორიაში და პასუხს დღეს ველოდებით, 11 ბიოლოგიური მასალა კი ხვალ დილით გაიგზავნება.-” განაცხადა ფოთის ჰოსპიტალის დირექტორმა, თეა მიგინეიშვილმა.

საქართველოს მთავრობის დადგენილებით დამტკიცებული ხორბლის იმპორტის სუბსიდირების სახელმწიფო პროგრამის განხორციელებაზე, გარემოს დაცვისა და სოფლის მეურნეობის სამინისტროს 2020 წლის ბიუჯეტიდან 5 200 000 ლარი გამოიყო. პროგრამის მიზანი არასაფურაჟე ხორბლის და პირველი ხარისხის ხორბლის ფქვილზე არსებული საცალო სარეალიზაციო ფასის შენარჩუნებაა. პროგრამის ბენეფიციარი ვალდებული იქნება პირველი ხარისხის ერთი 50 კგ-იან ტომარა ფქვილი არაუმეტეს 51 ლარად გაყიდოს. წინააღმდეგ შემთხვევაში, მას სუბსიდიის უკან დაბრუნება და პირგასამტეხლოს გადახდა მოუწევს.

კორონავირუსის გამო გამოცხადებული საგანგებო მდგომარეობისან გამომდინარე საქართველოს მასშტაბით ყველა სახელოვნებიო სასწავლებლებს და ცენტრებს  შეწყვეტილი აქვთ საქმიანობა. ამ პირობებში საქართველოს ფოლკლორის ცენტრმა დაიწყო ეგრეთწოდებული ჩელენჯი-გამოწვევა სახელწოდებით  „ფოლკლორი შენთვის“, რაც გულისხმობს ფოლკლორის სფეროს წარმომადგენლების მიერ ერთმანეთის გამოწვევას, ვიდეოების ჩაწერას და სოციალურ ქსელში ატვირთვას . აქციის მიზანი მოსახლეობაში  დადებითი განწყობის შექმნაა. ფოთიდან გამოწვევას ხელოვნების ქურუმის, ფოთის საპატიო მოქალაქის, იროდი ტიკარქაძის ოჯახი შეუერთდა. პირველ ეტაპზე აქციაში საოჯახო ანსამბლები არიან წარმოდგენილი

სამეგრელო-ზემო სვანეთის სახელმწიფო რწმუნებულის ალექსანდრე მოწერელიას განცხადებით, გუშინ სამეგრელოდან, ლუგარის ლაბორატორიაში გაგზავნილი 16-ივე ანალიზის პასუხი უარყოფითია. მისივე განმარტებით ანაკლია-განმუხურის საკარანტინო სივრცეში 36 ადამიანი იმყოფება, ხოლო რეგიონი თვითიზოლაციას 174 პირი გადის, ამ პერიოდის განმავლობაში თვითიზოლაცია მოეხსნა 837 მოქალაქეს.